İranın keçmiş ali dini lideri Əli Xameneinin dəfn mərasimi ərəfəsində mümkün izdiham və təhlükəsizlik riskləri ilə bağlı diqqətçəkən iddialar ortaya atılıb.
Elpress.az xəbər verir ki, İranın keçmiş ali dini lideri Əli Xameneinin dəfn mərasimi ilə bağlı xarici mediada diqqətçəkən iddialar yayılıb. Məlumatlara görə, mərasim zamanı yarana biləcək izdihamın ağır nəticələrə səbəb ola biləcəyi ehtimal edilir.İddialara əsasən, İran Qızıl Aypara Cəmiyyətinin ölkənin birinci vitse-prezidentinə ünvanladığı məxfi məktubda dəfn mərasimləri zamanı izdiham səbəbindən 1500-3000 nəfərin həyatını itirə biləcəyi ehtimalı qiymətləndirilib.Bildirilir ki, bu proqnozdan sonra İran hakimiyyəti mümkün fövqəladə halların qarşısını almaq məqsədilə xüsusi əməliyyat qrupu yaradıb. Həmçinin Tehran yaxınlığındakı Beheşt-e Zəhra qəbiristanlığında minlərlə yeni məzarın hazırlandığı da iddia olunur.“Die Welt” nəşrinin istinad etdiyi Tehran şəhər administrasiyasının əməkdaşının sözlərinə görə, aidiyyəti qurumlara mərasim zamanı 3000 nəfərə qədər ölüm halının baş verə biləcəyi barədə xəbərdarlıq edilib. Mənbə bu ehtimalı gözlənilən böyük izdiham və yüksək hava temperaturu ilə əlaqələndirib.
