Ermənistanın Baş naziri Nikol Paşinyan ölkəsinin Rusiya ilə dəmir yollarının idarə olunmasına dair imzalanmış müqaviləni birtərəfli qaydada ləğv etməyəcəyini bildirib.
Elpress.az xəbər verir ki, Ermənistanın Baş naziri Nikol Paşinyan Rusiya ilə “Cənubi Qafqaz Dəmir Yolu” şirkətinin idarə olunmasına dair mövcud müqavilənin birtərəfli qaydada ləğv edilməsinin gündəmdə olmadığını açıqlayıb. O, bu barədə brifinq zamanı jurnalistlərin suallarını cavablandırarkən danışıb.Paşinyan bildirib ki, Ermənistan hökuməti bu məsələdə mövqeyini dəyişməyib və müqavilənin birtərəfli şəkildə ləğv edilməsi planlaşdırılmır. Bununla yanaşı, o, əvvəlki açıqlamalarından da geri çəkilmədiyini vurğulayıb.Baş nazir qeyd edib ki, mövcud şəraitdə Ermənistan dəmir yollarının idarə olunmasının Rusiya konsessiyasında olması ölkənin rəqabət üstünlüklərinə mənfi təsir göstərir. Onun sözlərinə görə, bu məsələ gələcəkdə də müzakirə mövzusu olaraq qalacaq.Qeyd edək ki, Ermənistan hakimiyyəti son aylarda dəmir yollarının idarə olunmasına dair konsessiyanın üçüncü tərəfə verilməsinin mümkünlüyünü dəstəklədiyini dəfələrlə bəyan edib.
