Sanksiyalar zəifləyir, dondurulmuş vəsaitlər azad olunur: Tehran yeni mərhələdən danışır
Elpress.az-ın məlumatına əsasən, İran Prezidenti Məsud Pezeşkian ölkəsinin iqtisadi vəziyyəti və beynəlxalq danışıqlarla bağlı mühüm açıqlamalar verib.Qum şəhərinə səfəri zamanı çıxış edən Prezident bildirib ki, son atəşkəs və əldə olunan sülh razılaşması İran üçün mühüm nəticələr yaradıb. Onun sözlərinə görə, razılaşma çərçivəsində İranın neft və neft-kimya sektorlarına tətbiq edilən bir sıra məhdudiyyətlər aradan qaldırılıb, eyni zamanda xaricdə dondurulmuş maliyyə vəsaitlərinin ölkəyə qaytarılması istiqamətində irəliləyiş əldə olunub.Pezeşkian qeyd edib ki, Qətərdə saxlanılan İran aktivlərinin bir hissəsi olan 6 milyard dolların geri qaytarılması ilə bağlı razılıq əldə edilib. O bildirib ki, bu məbləğ ümumilikdə 12 milyard dollar həcmində olan dondurulmuş vəsaitlərin bir hissəsini təşkil edir və qalan vəsaitlərin də ölkəyə qaytarılması üçün danışıqlar davam etdirilir.İran liderinin sözlərinə görə, aktivlərin blokdan çıxarılması və sanksiyalarla bağlı əldə olunan razılaşmalar İsveçrədə keçirilən danışıqlar, eləcə də tərəflər arasında imzalanmış memorandumlar çərçivəsində mümkün olub.Prezident çıxışında İranın nüvə proqramına da toxunaraq, ölkəsinin nüvə silahı əldə etmək niyyətində olmadığını bir daha vurğulayıb. O bildirib ki, İranın fəaliyyəti yalnız milli ehtiyaclara və rəsmi şəkildə bəyan edilən siyasətə uyğun şəkildə həyata keçirilir.Pezeşkian həmçinin iddia edib ki, beynəlxalq vasitəçilik nəticəsində müəyyən tərəflər əldə olunmuş razılaşmanı qəbul etməyə məcbur qalıb. Onun sözlərinə görə, razılaşmaya qarşı çıxan qüvvələr olsa da, Tehran prosesin davam etdirilməsində maraqlıdır.İran Prezidenti əlavə edib ki, hökumət artıq müharibədən sonrakı bərpa proqramları üzərində işləyir. Bu çərçivədə əhaliyə sosial dəstəyin gücləndirilməsi, xüsusilə ərzaq subsidiyalarının maliyyələşdirilməsinin artırılması istiqamətində addımlar atılır.
