ABŞ administrasiyası Afrikada viza xidmətləri göstərən səfirlik və konsulluqlarının sayını nəzərəçarpacaq dərəcədə azaltmağa hazırlaşır. Planın diplomatik şəbəkənin yenidən təşkili və fəaliyyətin daha effektiv qurulması məqsədi daşıdığı bildirilir.
Elpress.az-ın Azərtac.az-a istinadən verdiyi məlumata əsasən, hazırda viza müraciətlərini qəbul edən 50 diplomatik nümayəndəliyin sayının 20-yə endirilməsi nəzərdə tutulur. Dəyişikliklərin yaxın həftələr ərzində qüvvəyə minəcəyi gözlənilir.Bununla belə, sözügedən səfirlik və konsulluqlar fəaliyyətlərini davam etdirəcək, ABŞ vətəndaşlarına konsulluq xidmətləri göstərəcək, həmçinin xüsusi hallarda viza müraciətlərini qəbul edib qiymətləndirəcəklər.AP agentliyinin məlumatına görə, bu qərar Vaşinqtonun immiqrasiya siyasətinin sərtləşdirilməsi, eləcə də viza müddəti başa çatdıqdan sonra ölkədə qanunsuz yaşayan şəxslərə qarşı mübarizə tədbirlərinin bir hissəsi hesab olunur.Xatırladaq ki, ABŞ Prezidenti Donald Tramp administrasiyası son aylarda immiqrasiyaya nəzarətin gücləndirilməsi və daha sərt məhdudiyyətlərin tətbiqi ilə bağlı mövqeyini dəfələrlə açıqlayıb.
