Elpress.az xəbər verir ki, Azərbaycanda qəbul edilməsi nəzərdə tutulan kriptovalyuta haqqında qanun layihəsinə əsasən, kriptoaktivlərlə bağlı fəaliyyət göstərmək istəyən təşkilatlar mütləq qaydada Azərbaycan Mərkəzi Bankından lisenziya almalı olacaqlar.
Bu barədə AMB-nin Maliyyə Texnologiyaları və İnnovasiyalar Departamentinin direktoru Fidan Tofidi “Azərbaycanın Rəqəmsal Maliyyə Gündəliyi” mövzusunda keçirilən tədbirdə çıxışı zamanı məlumat verib.
Onun sözlərinə görə, lisenziyanın əldə olunması üçün kifayət qədər ciddi və sərt meyarlar müəyyənləşdirilib və bu tələblərə cavab verməyən şirkətlərə fəaliyyət icazəsi verilməyəcək.
Fidan Tofidi bildirib ki, lisenziya alan təşkilatların fəaliyyəti də daimi nəzarətdə saxlanılacaq. Bu nəzarətin əsas məqsədlərindən biri çirkli pulların yuyulması və terrorçuluğun maliyyələşdirilməsi risklərinin qarşısının alınmasıdır.
AMB rəsmisi qeyd edib ki, kriptoaktivlər və kriptobazarda baş verən yeniliklər maliyyə sektoruna innovativ imkanlar gətirsə də, bu sahə eyni zamanda bir sıra risklər də yaradır.
“Bu səbəbdən Mərkəzi Bankın əsas hədəfi yalnız innovasiyaları dəstəkləmək deyil, həm də maliyyə sabitliyini və təhlükəsizliyi təmin etməkdir”, – deyə o vurğulayıb.
Qeyd edək ki, kriptoaktivlərlə bağlı yeni qanun layihəsi qəbul olunduqdan sonra bazarın tənzimlənməsi, iştirakçıların fəaliyyəti və nəzarət mexanizmləri ilə bağlı əlavə normativ qaydaların da hazırlanması nəzərdə tutulur.
