İran rəsmiləri Xəzər dənizində ticarət gəmisinə edilən hücumla bağlı Ukraynaya sərt xəbərdarlıq edərək hadisənin cavabsız qalmayacağını bəyan ediblər.
Elpress.az xəbər verir ki, İran Parlamenti sədrinin müavini Əli Nikzad bildirib ki, ölkəyə və onun maraqlarına qarşı yönələn hər hansı hücum silahlı qüvvələrin qanuni cavab tədbirlərinə səbəb olacaq.
Onun sözlərinə görə, Ukraynanın atdığı addım ciddi nəticələr doğura bilər və Tehran bu hadisəyə lazımi cavabı vermək niyyətindədir.
Məlumata əsasən, İranın ticarət gəmisi Xəzər dənizində hücuma məruz qalıb. Hadisə nəticəsində bir neçə ekipaj üzvünün yaralandığı bildirilir.
Baş verən olaydan sonra Ukraynanın Tehrandakı müvəqqəti işlər vəkili İran Xarici İşlər Nazirliyinə çağırılıb. İran tərəfi rəsmi etirazını çatdıraraq, hücumu beynəlxalq hüququn pozulması və bölgədə gərginliyi artıran addım kimi qiymətləndirib.
Rəsmi Tehran bildirib ki, İran vətəndaşlarının təhlükəsizliyinə yönəlmiş hər hansı təhdidə qarşı lazımi tədbirlər görüləcək. ABŞ-ın da son günlər Qara dənizdə baş verən hadisələrlə bağlı Ukraynaya xəbərdarlıq etdiyi xatırladılır.
