Milli Hidrometeorologiya Xidməti iyulun 27-28-də gözlənilən küləkli hava şəraiti ilə əlaqədar ölkə ərazisinin bir hissəsi üçün sarı və narıncı xəbərdarlıq elan edib.
Elpress.az xəbər verir ki, xəbərdarlığa əsasən, Bakıda və Abşeron yarımadasında, eləcə də Mingəçevir, Ağstafa, Qazax, Tovuz, Gəncə, Daşkəsən, Goranboy, Qobustan, Neftçala, Hacıqabul, Naftalan, Xaçmaz, Qusar və Şabran rayonlarında şimal-qərb küləyinin sürətinin 20,8–28,4 m/s-dək güclənəcəyi gözlənilir. Bu ərazilər üçün narıncı xəbərdarlıq qüvvədə olacaq.
Eyni zamanda, Naxçıvan Muxtar Respublikası, Gədəbəy, Göygöl, Şəmkir, Samux, Yevlax, Bərdə, Tərtər, Ağdam, Füzuli, Cəbrayıl, Zəngilan, Laçın, Kəlbəcər, Quba, Siyəzən, Xızı, Altıağac, İmişli, Şirvan, Beyləqan, Saatlı, Sabirabad, Salyan, Biləsuvar, Cəlilabad, Masallı, Lerik, Yardımlı, Lənkəran və Astara rayonlarında isə küləyin sürətinin 13,9–20,7 m/s arasında dəyişəcəyi proqnozlaşdırılır. Bu bölgələr üzrə sarı xəbərdarlıq verilib.
Mütəxəssislər vətəndaşlara güclü küləkli hava şəraiti ilə əlaqədar ehtiyatlı olmağı, zərurət olmadıqca açıq ərazilərdə uzun müddət qalmamağı və təhlükəsizlik qaydalarına riayət etməyi tövsiyə edirlər.
