Ukrayna Silahlı Qüvvələri Qara dənizdə Rusiyaya məxsus iki tankerə zərbə endirib.
Elpress.az xəbər verir ki, bu barədə Ukrayna Silahlı Qüvvələrinin Baş Qərargahına istinadən RBK-Ukrayna məlumat yayıb.Bildirilib ki, zərbələr nəticəsində Qara dəniz akvatoriyasında Rusiyanın iki tankeri, həmçinin Azov dənizində yerləşən üzən kran hədəfə alınıb.
Məlumata görə, tankerlər Rusiya ordusunun ehtiyacları üçün neft məhsulları və yanacağın daşınmasında istifadə olunurdu. Üzən kran isə liman əməliyyatlarının və hərbi dəniz logistikasının təmin edilməsində mühüm rol oynayırdı.
Baş Qərargahın açıqlamasına əsasən, Ukrayna hərbçiləri Zaporojye vilayətinin Zelenopolye yaşayış məntəqəsi yaxınlığında yerləşən “Buk” zenit-raket kompleksini də vurublar.
Bundan əlavə, Donetsk vilayətinin Novoekonomiçeskoye rayonundakı avtomobil körpüsünə zərbə endirildiyi bildirilib.
Qeyd olunub ki, həmin körpüdən Rusiya ordusu hərbi logistika məqsədilə istifadə edirdi. Ukrayna Silahlı Qüvvələrinin Baş Qərargahı Rusiya hərbi infrastrukturuna qarşı əməliyyatların davam etdiriləcəyini vurğulayıb.
