Yeni qayda 2027-2028-ci tədris ilindən tətbiq ediləcək
Elpress.az xəbər verir ki, 2027-2028-ci tədris ilindən etibarən xarici ölkə vətəndaşları Gürcüstanın ali məktəblərinə qəbul imtahanı vermədən daxil ola biləcəklər.Yeni qaydalara əsasən, tam orta təhsilini başa vurmuş əcnəbi abituriyentlər seçdikləri təhsil proqramına uyğun dil biliklərini beynəlxalq sertifikatla təsdiqləməli və ya Gürcüstanın Milli Qiymətləndirmə və İmtahan Mərkəzində müvafiq dil imtahanı verməlidirlər. Gürcü dilində tədris olunan proqramlara müraciət edənlərdən isə dövlət dili üzrə biliklərini təsdiqləmələri tələb olunacaq.Bakalavr proqramları üçün minimum dil tələbi B1, magistratura proqramları üçün isə B2 səviyyəsi müəyyənləşdirilib. Beynəlxalq dil sertifikatının etibarlı olması və verildiyi tarixdən üç ildən artıq vaxt keçməməsi şərtdir.Magistraturaya müraciət edən xarici vətəndaşlardan xarici ölkədə əldə etdikləri ali təhsil üzrə müvafiq akademik dərəcəni təsdiqləyən sənəd də tələb olunacaq.Gürcüstanda dövlət ali məktəblərində ölkə vətəndaşları üçün təhsilin ödənişsiz olması ilə əlaqədar 2026-2027-ci tədris ili üzrə xarici tələbələrin dövlət universitetlərinə qəbulu həyata keçirilməyib. Yeni qəbul qaydası isə özəl universitetlərə şamil edilməyəcək.Gürcüstanda xarici vətəndaşlar üçün ali təhsil ödənişlidir. İllik təhsil haqqı universitetdən və proqramın tədris dilindən asılı olaraq orta hesabla 1 500-8 000 ABŞ dolları arasında dəyişir.
