Almaniyada iyun ayında qeydə alınan suda boğulma halları son 23 ilin eyni dövrü üzrə ən yüksək səviyyəyə çatıb.
Elpress.az xəbər verir ki, Almaniyada iyun ayı ərzində 99 nəfər suda boğularaq həyatını itirib. Bu göstərici 2003-cü ildən bəri iyun ayı üzrə qeydə alınan ən yüksək rəqəm hesab olunur. Sonuncu dəfə 2003-cü ilin iyununda 107 nəfər suda boğulmuşdu.Məlumata görə, ölüm hallarının əksəriyyəti göllərdə və çaylarda baş verib. Statistikaya əsasən, suda boğularaq ölənlərin 90 faizindən çoxunu kişilər təşkil edib. Gənclər arasında qeydə alınan bütün ölüm hallarında da zərərçəkənlərin kişi olduğu bildirilib.Həlak olanlardan 40 nəfərin yaşı 30-dan aşağı, 35 nəfərin yaşı isə 50-dən yuxarı olub. Ən çox ölüm hadisəsi Şimali Reyn-Vestfaliya (22 nəfər), Bavariya (21 nəfər) və Baden-Vürtemberq (13 nəfər) əyalətlərində qeydə alınıb.Mütəxəssislər bildirirlər ki, isti hava şəraiti insanların çay, göl və digər su hövzələrinə axınını artırır ki, bu da boğulma riskini yüksəldir. Onların sözlərinə görə, xüsusilə çaylarda güclü axınlar, suyun temperatur fərqi və təhlükənin düzgün qiymətləndirilməməsi faciəvi nəticələrə səbəb ola bilər.
