Tramp administrasiyasının region siyasətini üç əsas istiqamət üzrə qurmağı planlaşdırdığı bildirilir
Elpress.az xəbər verir ki, ABŞ administrasiyasının İranla müharibədən sonrakı dövr üçün Yaxın Şərq siyasətini müəyyənləşdirəcək yeni strategiya üzərində işlədiyi iddia olunur.Hazırlıq mərhələsində olan strategiyanın Donald Trampın prezidentlik müddətinin qalan hissəsində Vaşinqtonun region siyasətinin əsas istiqamətlərini müəyyənləşdirməsi nəzərdə tutulur.Məlumata görə, planın üç əsas istiqamət üzrə formalaşdırılması nəzərdən keçirilir. İlk istiqamət İranın regiondakı təsir imkanlarının məhdudlaşdırılması üçün ABŞ-ın regional tərəfdaşları arasında daha sıx əməkdaşlıq mexanizminin yaradılmasını nəzərdə tutur.İkinci istiqamətdə Qəzza ilə bağlı planın növbəti mərhələsinin həyata keçirilməsi, İsrail və Suriya arasında təhlükəsizlik razılaşmasının əldə olunması və İsrail-Livan arasında mövcud razılaşmaların icrasının təmin edilməsi məsələləri yer alır.Üçüncü istiqamət isə İsrail ilə Yaxın Şərq ölkələri arasında münasibətlərin normallaşdırılmasının genişləndirilməsinə yönəlib. Bu çərçivədə İbrahim sazişlərinin əhatəsinin genişləndirilməsi və Səudiyyə Ərəbistanı ilə İsrail arasında normallaşma razılaşmasının əldə olunması hədəflənir.Strategiyanın hazırlanması zamanı İsraildə oktyabrın 27-də keçirilməsi planlaşdırılan parlament seçkilərinin və noyabrda ABŞ-da gözlənilən seçkilərin də nəzərə alındığı bildirilir.ABŞ administrasiyasının seçkilərdən sonra İsraildə formalaşacaq hökumətin Vaşinqtonun müharibədən sonrakı Yaxın Şərq siyasəti ilə əməkdaşlığa hazır olacağına ümid etdiyi qeyd olunur.
