Dövlət Proqramının iştirak tələblərinə uyğun gələn və I mərhələ üzrə sənədlərini uğurla tamamlayaraq təqdim etmiş namizədlərlə bu gündən – 8 iyun tarixindən etibarən müsahibə mərhələsinə başlanılıb.
Bildirilib ki, 2026–2027-ci tədris ili üzrə “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı” çərçivəsində bakalavriat, magistratura və doktorantura səviyyələri üzrə sənəd qəbulu mərhələsi yekunlaşıb.Qeyd olunub ki, 15 aprel – 5 iyun tarixlərini əhatə edən müraciət dövrü ərzində Dövlət Proqramı üzrə xaricdə təhsil imkanları üçün dünyanın 21 ölkəsinə aid 106 nüfuzlu ali təhsil müəssisəsi üzrə ümumilikdə 1221 namizəd müraciət edib. Müraciət edənlərdən 271 nəfər isə “Times Higher Education”, “QS World University Rankings” və “Academic Ranking of World Universities (Shanghai)” kimi beynəlxalq reytinq cədvəllərində ilk 10-luqda yer alan universitetlərdən qəbul əldə etməyi bacarıb.Qeyd edək ki, müsahibə mərhələsi ilə bağlı ətraflı məlumatlar namizədlərin portal.edu.az platformasındakı şəxsi kabinetləri vasitəsilə təqdim olunacaq.Eyni zamanda bildirilib ki, Azərbaycan Respublikasının Prezidenti İlham Əliyevin 12 avqust 2024-cü il tarixli 248 nömrəli Sərəncamına əsasən, Dövlət Proqramına qəbul üzrə illik kvota 500 nəfərədək müəyyən edilib. Bu kvotanın bölgüsünə əsasən, yerlərin 25 faizindən çox olmamaq şərti ilə bakalavriat, 20 faizindən çox olmamaq şərti ilə doktorantura, qalan hissə isə magistratura səviyyəsi üzrə nəzərdə tutulub.
