Elpress.az xəbər verir ki, Abşeron Rayon Mərkəzi Xəstəxanasının nəzdində fəaliyyət göstərən Aşağı Güzdək Ailə Sağlamlıq Mərkəzinin yeni binasının açılışı olub.
Açılış mərasimində Abşeron Rayon İcra Hakimiyyətinin başçısı Abdin Fərzəliyev, TƏBİB-in İcraçı direktorunun müşaviri Töhfə Cəmilova, Abşeron Rayon Mərkəzi Xəstəxanasının direktoru Hacı Lətifov, aidiyyəti qurumların nümayəndələri və tibb işçiləri iştirak ediblər.
Bildirilib ki, Aşağı Güzdək qəsəbəsində fəaliyyət göstərən tibb müəssisəsi əvvəlcə feldşer-mama məntəqəsi, daha sonra həkim məntəqəsi kimi xidmət göstərib. 2021-ci ildən isə Aşağı Güzdək Ailə Sağlamlıq Mərkəzi statusu ilə fəaliyyətini davam etdirir.Məlumata görə, əvvəlki binanın qəzalı vəziyyətdə olması səbəbindən müəssisənin yeni binaya köçürülməsi qərara alınıb.
Bir ildən artıq davam edən əsaslı təmir və yenidənqurma işləri başa çatdıqdan sonra mərkəz müasir binada fəaliyyətə başlayıb.Hazırda tibb müəssisəsi 12 min 600 nəfərə, o cümlədən 2 min 920 uşağa ilkin səhiyyə xidməti göstərir. Mərkəzdə 13 nəfərlik kollektiv çalışır. Onlardan 4-ü, bölmə müdiri də daxil olmaqla, həkim heyətidir.
Əhaliyə göstərilən tibbi xidmətlərin keyfiyyətinin yüksəldilməsi məqsədilə müəssisə ailə həkimi-terapevt, ailə həkimi-pediatr və həkim-mama-ginekoloq ixtisasları üzrə mütəxəssislərlə təmin olunub.
