Elpress.az xəbər verir ki, son günlər Bakı və Sumqayıtın bir sıra ərazilərində qurbağaların kütləvi şəkildə görünməsi sakinlər arasında narahatlıq yaradıb.
Xüsusilə Bakı şəhərinin Maştağa və Ramana qəsəbələrində, həmçinin Abşeron rayonunun Novxanı və Saray qəsəbələri, eləcə də Sumqayıtın Yaşma bağları və Qurd dərəsi ərazilərində həyətlər, küçələr və boş sahələr minlərlə qurbağa ilə dolub.
Sakinlərin sözlərinə görə, qurbağaların sayı o qədər çoxdur ki, onlar avtomobil yollarına çıxaraq nəqliyyatın hərəkətini də çətinləşdirir. Bəzi sürücülər yollarda daha ehtiyatlı hərəkət etməyə məcbur olduqlarını bildirirlər.
Məsələ ilə bağlı açıqlama verən Canlı Sistemlərin Tədqiqi İnstitutunun aparıcı elmi işçisi, biologiya üzrə fəlsəfə doktoru Gülbəniz Qasımova bildirib ki, bu il yaz və yay aylarında müşahidə olunan yağıntılı hava şəraiti qurbağaların çoxalması üçün əlverişli mühit formalaşdırıb.
Onun sözlərinə görə, aramsız yağışlar nəticəsində yaranan gölməçələr uzun müddət qurumayıb və bu da qurbağa kürülərinin böyük hissəsinin inkişafını tamamlamasına şərait yaradıb.
Mütəxəssis qeyd edib ki, hazırda müşahidə olunanlar əsasən Abşeron yarımadasında yayılan naxışlı quru qurbağasının bala fərdləridir. Bu növ minlərlə kürü qoyur və əlverişli şəraitdə onların böyük hissəsi inkişaf edərək yeni fərdlərə çevrilir.
Gülbəniz Qasımovanın sözlərinə görə, son yağışlardan sonra gölməçələrdəki bala qurbağaların sel suları vasitəsilə ətrafa yayılması onların kütləvi şəkildə görünməsinə səbəb olub.
Bioloq vurğulayıb ki, bu hal tamamilə təbiidir və insanlar üçün heç bir təhlükə yaratmır. O bildirib ki, təbiətdə qurbağaların sayını tənzimləyən təbii mexanizmlər mövcuddur və müəyyən müddətdən sonra onların sayı normal səviyyəyə qayıdacaq.
