Elpress.az xəbər verir ki, bu ilin sentyabr ayından etibarən Azərbaycanda məktəblərdə süni intellekt və kibertəhlükəsizlik dərslərinin tədrisinə başlanılması nəzərdə tutulur.
Yeni fənlərin hansı müəllimlər tərəfindən tədris ediləcəyi ilə bağlı məsələyə təhsil eksperti Elçin Əfəndi aydınlıq gətirib.
Ekspert bildirib ki, təşəbbüsün əsas məqsədi şagirdlərdə süni intellekt və kibertəhlükəsizlik sahəsində ilkin bilik və bacarıqların formalaşdırılmasıdır. Onun sözlərinə görə, bu dərslərə informasiya texnologiyaları, kompüter elmləri, süni intellekt və maşın təlimi üzrə ixtisaslaşmış mütəxəssislər, həmçinin riyaziyyat müəllimləri cəlb oluna bilərlər.
Elçin Əfəndi qeyd edib ki, yeni fənlər üzrə tədris mərhələli şəkildə həyata keçiriləcək və ilkin mərhələdə digər əsas fənlərdə olduğu qədər geniş dərs saatı ayrılması planlaşdırılmır.
Ekspert əlavə edib ki, perspektivdə süni intellekt və kibertəhlükəsizlik sahələri üzrə pedaqoji kadr hazırlığının gücləndirilməsi vacib olacaq. Bu məqsədlə gələcəkdə müəllim hazırlığı proqramlarına yeni istiqamətlərin daxil edilməsi və ya ixtisaslaşmış mütəxəssislərin birbaşa tədris prosesinə cəlb olunması zərurəti yarana bilər.
Mövzu ilə bağlı Elm və Təhsil Nazirliyinə, eləcə də Təhsil Sisteminin İnformasiyalaşdırılması İdarəsinə rəsmi sorğu ünvanlandığı bildirilib.
