Elpress.az xəbər verir ki, yeni növ koronavirus (COVID-19) infeksiyasına yoluxmuş xəstələrə tibbi xidmət göstərən həkim və tibb işçilərinin əməkhaqlarına ödənilən əlavənin müddəti yenidən uzadılıb.
Baş nazir Əli Əsədovun imzaladığı müvafiq qərara əsasən, Bakı şəhər Baş Səhiyyə İdarəsinin tabeliyində fəaliyyət göstərən xüsusi ambulator tibb məntəqələrində çalışan tibb işçilərinə verilən əlavə ödəniş 2026-cı il iyulun 1-dən oktyabrın 1-dək davam etdiriləcək.
Qərar COVID-19 infeksiyasına yoluxmuş xəstələrə ambulator-poliklinik tibbi yardım göstərən həkimlərin və digər tibb personalının sosial müdafiəsinin gücləndirilməsi məqsədilə qəbul olunub.
Qeyd edək ki, sözügedən əlavələr pandemiya dövründə riskli şəraitdə çalışan tibb işçilərinin əməyinin stimullaşdırılması üçün tətbiq edilir.
