Elpress.az xəbər verir ki, Baş Dövlət Yol Polisi İdarəsi (BDYPİ) qeyri-sabit hava şəraiti ilə əlaqədar hərəkət iştirakçılarına müraciət edib.
Müraciətdə sürücülərdən hava şəraitini və yolun vəziyyətini nəzərə alaraq nəqliyyat vasitələrini idarə edərkən xüsusilə diqqətli və ehtiyatlı olmaları xahiş olunub.
Bildirilib ki, yağıntılı və görmə məsafəsinin məhdud olduğu şəraitdə sürət həddi aşağı salınmalı, nəqliyyat vasitələri arasında ara məsafəsi artırılmalıdır. Həmçinin qəfil manevrlərdən və kəskin tormozlamalardan çəkinmək, avtomobilin işıq cihazlarından düzgün istifadə etmək tövsiyə olunub.Piyadalara da yağışlı hava şəraitində yollarda daha diqqətli olmaları tövsiyə edilib. Onlardan yolu yalnız müəyyən edilmiş piyada keçidlərindən keçmələri, yolun hərəkət hissəsinə qəfil çıxmamaları və keçid zamanı diqqəti yayındıran cihazlardan istifadə etməmələri xahiş olunub.
BDYPİ yol hərəkəti iştirakçılarını əlverişsiz hava şəraitində qaydalara ciddi əməl etməyə, diqqətli və məsuliyyətli davranmağa çağırıb.
