Deputat ailənin real gəlirinin və sosial yükünün nəzərə alınmasını təklif edib
Elpress.az xəbər verir ki, Təhsil kreditlərindən yararlanma meyarlarına yenidən baxılması təklif olunub.Milli Məclisin Elm və təhsil komitəsinin iclasında deputat Elnarə Akimova bildirib ki, güzəştli təhsil kreditlərinin müəyyənləşdirilməsi zamanı yalnız valideynlərin işləyib-işləməməsi əsas meyar olmamalıdır.Onun sözlərinə görə, hər iki valideynin işləməsi ailənin maddi baxımdan təminatlı olması anlamına gəlmir. Kirayə, kommunal ödənişlər, müalicə xərcləri və ailədə bir neçə övladın eyni vaxtda təhsil alması büdcəyə ciddi yük yarada bilər.Deputat hesab edir ki, təhsil kreditlərinin meyarları müəyyənləşdirilərkən ailənin real gəliri, sosial yükü və maddi vəziyyəti də nəzərə alınmalıdır.Elnarə Akimova vurğulayıb ki, hər iki valideyni işləyən, lakin real maliyyə çətinliyi yaşayan istedadlı tələbələrin də güzəştli təhsil kreditlərindən yararlanmasına imkan verən daha ünvanlı və ədalətli mexanizm yaradılmalıdır.
