Prezident İlham Əliyevin Almaniyaya rəsmi səfəri Azərbaycan ilə Almaniya arasında əməkdaşlığın yeni mərhələyə qədəm qoyması baxımından mühüm əhəmiyyət daşıyır.
Elpress.az AZƏRTAC-a istinadən xəbər verir ki, bunu Milli Məclisin deputatı Əlibala Məhərrəmzadə bildirib.Deputatın sözlərinə görə, səfər çərçivəsində imzalanan “Azərbaycan Respublikası ilə Almaniya Federativ Respublikası arasında İkitərəfli Tərəfdaşlıq üçün Strateji Gündəlik haqqında Birgə Bəyannamə” iki ölkə arasında siyasi, iqtisadi, enerji, nəqliyyat və təhlükəsizlik sahələrində əməkdaşlığın gələcək inkişaf istiqamətlərini müəyyənləşdirən mühüm sənəd kimi qiymətləndirilir.
Qeyd olunub ki, enerji sahəsində əldə edilən razılaşmalar Azərbaycanın Avropanın enerji təhlükəsizliyində etibarlı tərəfdaş rolunu daha da gücləndirir. Bununla yanaşı, iqtisadi əməkdaşlığın genişləndirilməsi, investisiya imkanlarının artırılması, yaşıl enerji və innovasiya layihələrinin həyata keçirilməsi üçün də yeni perspektivlər yaranıb.Deputat bildirib ki, səfər zamanı Orta Dəhlizin inkişafı, logistika əlaqələrinin genişləndirilməsi və Cənubi Qafqazda sülh prosesinə dair məsələlər də müzakirə olunub. Onun sözlərinə görə, bu görüşlər regional əməkdaşlığın və iqtisadi inteqrasiyanın güclənməsinə töhfə verəcək.
Əlibala Məhərrəmzadə vurğulayıb ki, Prezident İlham Əliyevin Almaniyaya rəsmi səfəri Azərbaycan–Almaniya münasibətlərinin strateji tərəfdaşlıq səviyyəsində inkişafına yeni təkan verən mühüm diplomatik hadisə kimi qiymətləndirilir.
