Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 7-ci Zirvə Görüşü keçirilib. Toplantıda Laosun təşkilata üzvlüyü təsdiqlənib, Azərbaycanın sədrliyinin daha iki il davam etdirilməsi təşəbbüsü dəstəklənib.
Elpress.az xəbər verir ki, oktyabrın 15-də keçirilən tədbirdə Prezident İlham Əliyev dövlət və hökumət başçılarını qarşılayıb və zirvə görüşünü açıq elan edib.
Dövlət başçısı çıxışında beynəlxalq təşkilatların qəbul etdiyi qərarların icrasını təmin edən mexanizmlərin vacibliyinə diqqət çəkib. O, Ermənistanla Azərbaycan arasında yaranmış sülhün hələ kövrək olduğunu bildirərək onun qorunması və möhkəmləndirilməsinin zəruriliyini vurğulayıb.
İlham Əliyev Azərbaycanın AQEM-ə sədrliyi dövründə nəqliyyat, rəqəmsallaşma, ətraf mühit, turizm, təhsil və elm sahələrində əməkdaşlığın inkişafına diqqət yetirildiyini qeyd edib. Onun sözlərinə görə, üzv dövlətlərin dəstəyi ilə təşkilatın institusional imkanları gücləndirilib.
Toplantıda Laos Xalq Demokratik Respublikasının AQEM-ə yeni üzv kimi qəbul edilməsi də rəsmiləşib. Prezident İlham Əliyev bu addımı təşkilatın Asiyada daha geniş və inklüziv dialoq platformasına çevrilməsi baxımından əhəmiyyətli hadisə kimi dəyərləndirib.
Zirvə görüşündə iştirak edən bir sıra ölkələrin liderləri Azərbaycanın sədrliyini və tədbirin təşkilini yüksək qiymətləndiriblər. Azərbaycanın AQEM-ə sədrliyinin 2028-ci ilədək uzadılması təşəbbüsü də toplantıda dəstək alıb.
