Türkiyənin xarici işlər naziri Hakan Fidan Azərbaycanla münasibətlərdə bəzi məsələlər üzrə fərqli yanaşmaların ola biləcəyini bildirib. O, bu cür fikir ayrılıqlarının sosial şəbəkələrdə təbliğat vasitəsinə çevrilməməsinin və tərəflər arasında sivil şəkildə müzakirə olunmasının vacibliyini vurğulayıb.
Elpress.az xəbər verir ki, Hakan Fidan bu barədə oktyabrın 15-də Bakıda jurnalistlərə açıqlamasında danışıb. O, Asiyada Qarşılıqlı Fəaliyyət və Etimad Tədbirləri üzrə Müşavirənin (CICA) VII Zirvə toplantısında iştirak etmək üçün Azərbaycana səfəri çərçivəsində iki ölkə arasındakı münasibətlərə dair sualları cavablandırıb.
Nazir qeyd edib ki, Azərbaycan və Türkiyə arasında bəzi məsələlərə fərqli yanaşmaların olması mümkündür. Onun sözlərinə görə, bu cür mövzular qardaşlıq münasibətlərinə uyğun şəkildə müzakirə edilməli, ikitərəfli əlaqələrin zəiflədilməsi üçün istifadə olunmamalıdır.
Fidan bildirib ki, hər iki xalqın ortaq tarixi və köklü əlaqələri mövcuddur. O, problemlərin sosial media üzərindən təbliğat vasitəsinə çevrilməsinə ehtiyac olmadığını, məsələlərin birbaşa dialoq yolu ilə həllinin daha doğru olduğunu vurğulayıb.
Nazir Azərbaycan Prezidenti İlham Əliyevlə görüşündə də bu məsələlərin müzakirə olunduğunu açıqlayıb. O, dövlət başçısının mövqeyini və fikirlərini dinlədiklərini bildirərək, iki lider arasındakı dostluq və qardaşlıq bağlarının bundan sonra da möhkəm qalacağını deyib.
Qeyd edək ki, Prezident İlham Əliyev oktyabrın 15-də Hakan Fidanı qəbul edib. Prezidentin rəsmi saytında yayılan məlumata əsasən, görüşdə Azərbaycan-Türkiyə münasibətlərində son dövrlərdə müşahidə olunan proseslər ətrafında fikir mübadiləsi aparılıb.
