Azərbaycan müharibədən sonra qisas yolunu deyil, sülhü seçib. Dövlət başçısı bildirib ki, ölkəmiz ərazi bütövlüyünü və suverenliyini bərpa etdikdən sonra Ermənistana sülh təklif edib, bu gün isə əldə olunan razılaşmanın qorunması və möhkəmləndirilməsi vacibdir.
Prezidentin sözlərinə görə, Ermənistan və onun arxasında dayanan qüvvələr Azərbaycanın öz suverenliyini güc yolu ilə bərpa etmək əzmini düzgün qiymətləndirməyiblər. O vurğulayıb ki, Azərbaycan xalqının azadlıqsevərliyi, milli ləyaqəti, adət-ənənələri və mənəvi dəyərləri bu mübarizədə mühüm rol oynayıb.
Dövlət başçısı qeyd edib ki, xalqımız 30 il ərzində yaşadığı əzablara, törədilmiş soyqırımlarına, şəhər və kəndlərin dağıdılmasına baxmayaraq, məğlub tərəfdən qisas almaq yoluna getməyib. Azərbaycan döyüş meydanında qələbə qazanıb, işğalçılara qarşı mübarizəsini başa çatdırıb və bundan sonra sülhə üstünlük verib.
Prezident bildirib ki, Azərbaycanın davranışı xalqın mənəvi keyfiyyətlərini və humanist mövqeyini nümayiş etdirir. Onun sözlərinə görə, ölkəmiz qarşı tərəfin səviyyəsinə enməyib, əvəzində sülh təklif edib.
Dövlət başçısı hazırkı vəziyyətə toxunaraq vurğulayıb ki, Azərbaycan və Ermənistan arasında formalaşan sülh hələ kövrəkdir. Buna görə də əldə olunan sülhün qorunması və daha da möhkəmləndirilməsi xüsusi əhəmiyyət daşıyır.
