Azərbaycan və Türkiyə arasında məktəbli geyimi ilə bağlı müzakirələr fonunda deputat iki ölkənin strateji münasibətlərinin ayrı-ayrı şəxslərin açıqlamalarından təsirlənməməli olduğunu bildirib.
Elpress.az xəbər verir ki, bu barədə Milli Məclisin Azərbaycan-Türkiyə parlamentlərarası əlaqələr üzrə işçi qrupunun üzvü Modern.az-a açıqlamasında danışıb.
Deputatın sözlərinə görə, iki ölkə arasında müəyyən fikir ayrılıqlarının yaranması mümkündür, lakin bu hallar qardaşlıq münasibətlərinə xələl gətirməməlidir. O, Türkiyənin Azərbaycan üçün xüsusi əhəmiyyət daşıdığını vurğulayıb.
Millət vəkili Türkiyə Prezidenti Rəcəb Tayyib Ərdoğanın baş müşaviri Oqtay Saralın məktəbli forması ilə bağlı açıqlamalarına da münasibət bildirib. O qeyd edib ki, dövlətlərarası münasibətlər qarşılıqlı hörmətə və ölkələrin daxili işlərinə qarışmamaq prinsipinə əsaslanmalıdır. Deputat Saralın siyasətçi olmadığını xatırladaraq, bununla belə, heç kimin başqa dövlətin daxili məsələlərinə müdaxilə etməməli olduğunu deyib.
Açıqlamasında Türkiyədə fəaliyyət göstərən dini qruplaşmaların siyasi proseslərə təsir imkanlarına da toxunan deputat, oxşar məsələlərin keçmişdə Azərbaycanda da gündəmə gəldiyini bildirib. Onun fikrincə, Türkiyə Azərbaycanın dövlətçilik və təhlükəsizlik məsələlərinə həssas yanaşmasını anlayır və bu mövqeyi nəzərə alır.
