Azərbaycan Dövlət Akademik Milli Dram Teatrında Xalq artisti Nurəddin Mehdixanlının 70 illik yubileyinə həsr olunan mərasim keçirilib.
Elpress.az xəbər verir ki, oktyabrın 14-də təşkil edilən “Səhnədə ömür, sənətdə əbədilik” adlı gecədə dövlət rəsmiləri, millət vəkilləri, tanınmış mədəniyyət xadimləri və sənətsevərlər iştirak ediblər.
Tədbirdə aktyorun teatr sənətinə töhfələri, yaratdığı obrazlar və yaradıcılıq yolu barədə çıxışlar edilib. Mədəniyyət Nazirliyinin yubilyara ünvanladığı təbrik məktubu oxunub, Xalq artistləri Mələkxanım Əyyubova, Samir Cəfərov və Nazpəri Dostəliyeva musiqi nömrələri ilə onu təbrik ediblər.
Gecədə Gürcüstan, Türkiyə və Moldovadan tanınmış teatr xadimlərinin videotəbrikləri nümayiş etdirilib, Özbəkistandan göndərilən təbrik məktubu səsləndirilib. Nurəddin Mehdixanlının müxtəlif illərdə səhnələşdirilən əsərlərdə ifa etdiyi rollardan görüntülər də təqdim olunub. Akademik Milli Dram Teatrının gənc aktyorlarının həmin səhnələrə canlı ifaları gecəyə xüsusi məna qatıb.
1980-ci ildə ilk dəfə bu teatrın səhnəsinə çıxan yubilyar çıxışında təşkilatçılara və iştirakçılara təşəkkür edib. O, Azərbaycan teatrının və mədəniyyətinin yeni nəsillər tərəfindən inkişaf etdirilməsinin vacibliyini vurğulayıb.
Mərasim aktyorun baş rolda çəkildiyi “Cavad xan” filmindən məşhur monoloq-duanın nümayişi ilə yadda qalıb.
