Azərbaycan və Seneqal əmək təhlükəsizliyi və sağlamlığı sahəsində əməkdaşlığı genişləndirir
Elpress.az xəbər verir ki, Seneqalın Dövlət Qulluğu, Əmək və Dövlət Xidmətinin İslahatı Nazirliyinin nümayəndə heyəti İslam Əməkdaşlıq Təşkilatının Əmək Mərkəzinin dəvəti ilə Azərbaycana işgüzar səfər edib.Səfərin əsas məqsədi iki ölkənin müvafiq qurumları arasında əlaqələrin möhkəmləndirilməsi, təcrübə mübadiləsinin aparılması və əməkdaşlıq imkanlarının genişləndirilməsi olub.Səfər çərçivəsində İƏT Əmək Mərkəzinin Baş direktoru Azər Bayramov ilə Seneqalın aidiyyəti nazirinin rəhbərlik etdiyi nümayəndə heyəti arasında görüş keçirilib. Görüş zamanı əməyin təhlükəsizliyi və sağlamlığı sahəsində birgə fəaliyyətin genişləndirilməsi, həmçinin 2027-ci ildə Dakar şəhərində təşkil olunacaq Əməyin Təhlükəsizliyi və Sağlamlığı üzrə 24-cü Dünya Konqresinə hazırlıq məsələləri müzakirə edilib.Görüşün sonunda tərəflər arasında strateji tərəfdaşlığa dair Anlaşma Memorandumu imzalanıb. Sənəd İƏT Əmək Mərkəzinin 26–30 aprel 2027-ci il tarixlərində Dakarda keçiriləcək Dünya Konqresində Strateji Tərəfdaş kimi iştirakını və əmək təhlükəsizliyi sahəsində əməkdaşlığın əsas istiqamətlərini müəyyənləşdirir.Əməkdaşlıq çərçivəsində rəqəmsallaşma və süni intellektin iş yerlərində təhlükəsizlik və sağlamlığa təsiri, elmi araşdırmalar, texniki əməkdaşlıq və praktiki həllərin hazırlanması əsas diqqət istiqamətləri olacaq.
