Qadağan olunmuş məlumatların yayılması ilə bağlı internet məhdudiyyətləri genişləndirilib
Elpress.az xəbər verir ki, Azərbaycanda internet informasiya ehtiyatlarına girişin müvəqqəti məhdudlaşdırıla biləcəyi hallar genişləndirilib.Yeni dəyişikliklər Prezident İlham Əliyevin təsdiqlədiyi qanunla Cinayət, Cinayət-Prosessual məcəllələrinə və “İnformasiya, informasiyalaşdırma və informasiyanın mühafizəsi haqqında” qanuna edilən əlavələrdə əksini tapıb.Dəyişikliklərə əsasən, narkotik vasitələrin və psixotrop maddələrin hazırlanması və istifadəsi ilə bağlı məlumatların, onların qanunsuz əldə edildiyi yerlər və narkotik tərkibli bitkilərin kultivasiya üsulları barədə informasiyaların yayılması zamanı müvafiq internet resursuna və ya onun müəyyən hissəsinə giriş müvəqqəti məhdudlaşdırıla bilər.Eyni tədbir təhqir və böhtan xarakterli, şəxsi həyatın toxunulmazlığını pozan, həmçinin insanların həyat və sağlamlığına, ictimai təhlükəsizliyə və müxtəlif infrastruktur obyektlərinin fəaliyyətinə təhlükə yarada biləcək yalan məlumatların yayılması hallarına da şamil ediləcək.Bundan əlavə, qumar oyunlarının internet, mobil rabitə, sosial şəbəkələr və digər elektron platformalar vasitəsilə təşkili, yetkinlik yaşına çatmayanların qumara cəlb edilməsi və bu fəaliyyətin qrup halında və ya böyük gəlir əldə etməklə həyata keçirilməsi üçün yeni cəza tədbirləri müəyyənləşdirilib.Qanuna əsasən, daha ağır hallarda, o cümlədən mütəşəkkil dəstə və ya cinayətkar birlik tərəfindən törədilən və külli miqdarda gəlir gətirən qumar fəaliyyəti üzrə 3 ildən 5 ilədək azadlığın məhdudlaşdırılması və ya azadlıqdan məhrumetmə cəzası tətbiq oluna bilər.
