Ağdaşın sosial-iqtisadi potensialının inkişafı üzrə təkliflər hazırlanır
Elpress.az xəbər verir ki, Ağdaş rayonunun uzunmüddətli sosial-iqtisadi inkişaf imkanlarının müəyyənləşdirilməsi məqsədilə araşdırmalar aparılır.Elm və Təhsil Nazirliyinin İqtisadiyyat İnstitutunun nümayəndələri “Ağdaş rayonunun strateji sosial-iqtisadi inkişaf istiqamətləri” layihəsi çərçivəsində rayona səfər ediblər. Səfər zamanı yerli icra hakimiyyəti nümayəndələri ilə görüş keçirilib və layihə üzrə görülən işlərin hazırkı vəziyyəti nəzərdən keçirilib.Müzakirələrdə tədqiqatların növbəti mərhələləri və təşkilati məsələlərlə yanaşı, rayonun iqtisadi potensialından daha səmərəli istifadə imkanları da diqqət mərkəzində olub.Layihə çərçivəsində sahibkarlar və müxtəlif sahələr üzrə mütəxəssislər arasında sorğular keçirildiyi, kənd təsərrüfatı, sənaye, xidmət, logistika, energetika və turizm kimi istiqamətlərin təhlil edildiyi bildirilib. Aparılan araşdırmalar əsasında rayonun inkişaf potensialı qiymətləndirilib və yeni layihə təklifləri hazırlanıb.Tədqiqatın əsas məqsədi Ağdaşın iqtisadi imkanlarını elmi əsaslarla qiymətləndirmək, investisiya cəlbediciliyini artırmaq və rayonun uzunmüddətli inkişafına dair strateji təkliflər hazırlamaqdır.Görüş zamanı layihənin ilkin nəticələri və rayonun gələcək inkişaf perspektivləri ilə bağlı fikir mübadiləsi aparılıb. Araşdırmaların davam etdirilməsi və layihənin praktiki nəticələrinin gücləndirilməsi istiqamətində təkliflər səsləndirilib.
