Bakıda keçirilən BMT İdarəetmə İnnovasiyaları Sammitində Azərbaycanın dövlət idarəçiliyi sahəsində təcrübəsi və həyata keçirilən islahatlar diqqət mərkəzinə gətirilib.
Elpress.az xəbər verir ki, Prezident İlham Əliyev “BMT İdarəetmə İnnovasiyaları Sammiti: Gələcəyə Hazır Təsisatların İnkişafı” beynəlxalq tədbirinin iştirakçılarına müraciət ünvanlayıb. Müraciəti Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev oxuyub.
Dövlət başçısı müraciətində “ASAN xidmət” modelinin Azərbaycanın dövlət idarəçiliyi sahəsində mühüm yeniliklərindən biri olduğunu vurğulayıb. Bildirilib ki, 2012-ci ildə yaradılan bu sistem dövlət xidmətlərinin daha əlçatan, şəffaf və innovativ şəkildə göstərilməsinə imkan yaradıb.
Prezident qeyd edib ki, Azərbaycan “ASAN xidmət” təcrübəsini 50-dən çox ölkə ilə bölüşüb. Model BMT tərəfindən də yüksək qiymətləndirilib və 2015-ci ildə Dövlət Xidmətləri Mükafatına, 2019-cu ildə isə rəqəmsal idarəetmə sahəsində xüsusi mükafata layiq görülüb.
Qeyd edək ki, noyabrın 5-6-da keçirilən sammit BMT-nin İqtisadi və Sosial Məsələlər üzrə Departamenti və Azərbaycanın Dövlət Agentliyinin birgə təşkilatçılığı ilə baş tutur. Tədbirdə 100-dən çox ölkədən nazirlər, yüksək vəzifəli şəxslər, beynəlxalq təşkilatların nümayəndələri və ekspertlər iştirak edirlər.
