Türk dövlətləri ilə əlaqələrin gücləndirilməsinin Azərbaycanın regional siyasətində mühüm yer tutduğu vurğulanıb
Elpress.az xəbər verir ki, Azərbaycanın son illərdə Türk Dövlətləri ilə siyasi və diplomatik əlaqələrini daha da genişləndirməsi ölkənin regiondakı mövqeyinin güclənməsinin göstəricisi kimi qiymətləndirilib.Məqalədə qeyd olunur ki, 2026-cı ilin aprelində keçirilən 5-ci Antalya Diplomatiya Forumunda Azərbaycan Prezidenti İlham Əliyev Türkiyə Prezidenti Rəcəb Tayyib Ərdoğan başda olmaqla müxtəlif ölkələrin dövlət və hökumət rəhbərləri ilə görüşlər keçirib. Müəllif bu və digər yüksək səviyyəli təmasların Azərbaycanın türk dünyası ilə münasibətlərə verdiyi əhəmiyyəti nümayiş etdirdiyini bildirib.Yazıda vurğulanır ki, Azərbaycan və Türk Dövlətləri arasında siyasi və iqtisadi əməkdaşlığın genişləndirilməsi, qarşılıqlı inteqrasiyanın gücləndirilməsi ölkənin strateji istiqamətlərindən biri kimi nəzərdən keçirilir.Müəllif Azərbaycanın 2020-ci ildə əldə etdiyi Zəfərdən sonra bölgədə və daha geniş regionda mövqeyinin əhəmiyyətli dərəcədə gücləndiyini qeyd edib. Bildirilib ki, Bakı türk dövlətləri ilə münasibətlərin inkişafında yalnız iştirak edən tərəf deyil, eyni zamanda proseslərin formalaşmasına və istiqamətləndirilməsinə təsir göstərən əsas ölkələrdən biridir.Məqalədə Türk dünyasının daha sıx inteqrasiyasının Azərbaycan dövlətçiliyi baxımından mühüm strateji məqsədlərdən biri olduğu vurğulanır.
