Rusiya hava məkanında tətbiq edilən məhdudiyyətlər AZAL-ın Bakı–Moskva uçuşlarında dəyişikliklərə səbəb olub. Bir təyyarə Sankt-Peterburqa məcburi eniş edib, digər reys isə Bakıya geri dönüb.
Elpress.az xəbər verir ki, 9 oktyabr üçün nəzərdə tutulan Bakı–Moskva–Bakı istiqamətindəki bir neçə uçuşun qrafiki dəyişdirilib.
Səhər saatlarında J2-185 nömrəli Bakı–Moskva reysi Sankt-Peterburqa eniş etməli olub. Hava məkanında yenidən məhdudiyyətlər tətbiq edildiyindən təyyarənin Bakıya qayıtması da mümkün olmayıb.
Eyni istiqamətdə hərəkət edən J2-805 nömrəli təyyarə isə Heydər Əliyev Beynəlxalq Aeroportuna geri dönüb.
Baş verən dəyişikliklər axşam uçuşlarının planlaşdırılmasına da təsir göstərib. Nəticədə J2-186 və J2-806 nömrəli Moskva–Bakı reysləri təxirə salınıb.
AZAL yaranmış vəziyyətlə bağlı əməliyyatları izlədiyini, sərnişinlərə lazımi dəstəyin göstərilməsi üçün tədbirlər gördüyünü bildirib. Uçuş cədvəlindəki yeniliklər barədə sərnişinlərə aviaşirkətin rəsmi informasiya kanalları vasitəsilə məlumat veriləcək.
