Ceyhun Bayramov və Kestutis Budris Azərbaycan-Aİ münasibətlərinin inkişaf perspektivlərini nəzərdən keçiriblər
Elpress.az xəbər verir ki, Azərbaycanın xarici işlər naziri Ceyhun Bayramov ilə Litvanın xarici işlər naziri Kestutis Budris arasında telefon danışığı baş tutub.Söhbət zamanı Azərbaycan-Litva münasibətlərinin hazırkı vəziyyəti və gələcək inkişaf istiqamətləri barədə fikir mübadiləsi aparılıb. Tərəflər siyasi dialoqun davam etdirilməsinin və qarşılıqlı maraq doğuran sahələrdə əməkdaşlığın genişləndirilməsinin vacibliyini vurğulayıblar.Nazirlər çoxtərəfli platformalarda tərəfdaşlığın inkişaf etdirilməsinin də əhəmiyyətini qeyd ediblər.Kestutis Budris Litvanın 2027-ci ilin ilk yarısında Avropa İttifaqı Şurasına sədrliyə hazırlığı barədə məlumat verib. Danışıq zamanı Litvanın sədrliyi dövründə Azərbaycan-Avropa İttifaqı münasibətləri çərçivəsində müxtəlif istiqamətlər üzrə əməkdaşlığın inkişaf etdirilməsi imkanları ətrafında fikir mübadiləsi aparılıb.Telefon danışığında regional təhlükəsizlik məsələləri də diqqət mərkəzində olub. Tərəflər Cənubi Qafqazdakı vəziyyəti, regionda davamlı sülh və sabitliyin təmin olunması istiqamətində görülən işləri, həmçinin qarşılıqlı maraq doğuran digər beynəlxalq məsələləri müzakirə ediblər.
