Elpress.az xəbər verir ki, Səhiyyə Nazirliyində Azərbaycanda səfərdə olan Şimali Kipr Türk Respublikasının səhiyyə naziri Hakan Dinçyürekin rəhbərlik etdiyi nümayəndə heyəti ilə görüş keçirilib.
Görüşdə çıxış edən Azərbaycanın səhiyyə naziri Teymur Musayev iki ölkə arasında əlaqələrin müxtəlif istiqamətlərdə uğurla inkişaf etdiyini bildirib.
O, səhiyyə sahəsində təcrübə mübadiləsinin, tibb təhsili, səhiyyənin idarə olunması, rəqəmsal həllərin tətbiqi və tibbi xidmətlərin təşkili üzrə əməkdaşlığın genişləndirilməsi üçün əlverişli imkanların mövcud olduğunu vurğulayıb.
Nazir, həmçinin Azərbaycanda son illər həyata keçirilən səhiyyə islahatları, tibbi infrastrukturun yenilənməsi, rəqəmsallaşdırma prosesi və əhalinin keyfiyyətli tibbi xidmətlərə çıxışının yaxşılaşdırılması istiqamətində görülən işlər barədə qonaqlara məlumat verib.
Şimali Kipr Türk Respublikasının səhiyyə naziri Hakan Dinçyürek göstərilən qonaqpərvərliyə görə təşəkkür edərək, Azərbaycanla səhiyyə sahəsində əməkdaşlığın inkişafına xüsusi önəm verdiklərini bildirib. Onun sözlərinə görə, tibb təhsili, mütəxəssis hazırlığı, rəqəmsal səhiyyə, tibbi xidmətlərin təşkili və sağlamlıq turizmi istiqamətlərində təcrübə mübadiləsi hər iki tərəf üçün faydalı ola bilər.
Görüş zamanı səhiyyə və tibb elmi sahəsində birgə fəaliyyətin genişləndirilməsi, tibb işçilərinin qarşılıqlı təlim proqramlarında iştirakı, elmi-tədqiqat əməkdaşlığı, sağlamlıq turizmi və qarşılıqlı maraq doğuran digər məsələlər ətrafında fikir mübadiləsi aparılıb.
