Media üçün Kontent Hazırlama Mərkəzi Azərbaycanla birgə televiziya, kino və digər layihələr həyata keçirir
Elpress.az xəbər verir ki, Özbəkistanda Prezident Administrasiyasının nəzdində fəaliyyət göstərən Media üçün Kontent Hazırlama Mərkəzi Azərbaycanla media sahəsində əməkdaşlığın genişləndirilməsi istiqamətində yeni layihələr həyata keçirir.Mərkəzin direktor müavini Cahongir Abduraxmanov bildirib ki, fəaliyyətinin birinci ildönümünü qeyd etməyə hazırlaşan qurum Özbəkistan Prezidentinin təşəbbüsü ilə yaradılıb. Onun sözlərinə görə, mərkəzin əsas məqsədi media fəaliyyətini tənzimləmək deyil, sektorun inkişafına dəstək göstərmək, keyfiyyətli və obyektiv kontentin hazırlanmasını təşviq etməkdir.Abduraxmanov qeyd edib ki, mərkəzin prioritet istiqamətlərindən biri Özbəkistanın beynəlxalq aləmdə, o cümlədən Azərbaycanda daha geniş tanıdılmasıdır. Bu çərçivədə azərbaycanlı həmkarlarla televiziya, kino və birgə çəkilişləri əhatə edən çoxsaylı layihələr həyata keçirilir.Hazırda Azərbaycanla birlikdə Özbəkistana səyahətdən bəhs edən film üzərində iş aparılır. Filmin müəyyən səhnələrinin Azərbaycanda çəkilməsi də planlaşdırılır.Direktor müavini Türk Dövlətləri Təşkilatı çərçivəsində media sahəsində əməkdaşlığın davam etdiyini və Azərbaycanla Özbəkistanın müvafiq qurumları arasında təcrübə mübadiləsinə dair razılaşmaların mövcud olduğunu bildirib.Azərbaycandan olan jurnalistlərin iştirakı ilə keçirilən media turuna da toxunan Abduraxmanov səfərin iki ölkə arasında əməkdaşlığın praktiki nümunələrindən biri olduğunu deyib. O bildirib ki, turun əsas məqsədi Özbəkistanda son 10 ildə baş verən dəyişiklikləri, yeni sənaye sahələrini, obyektləri və inkişaf istiqamətlərini Azərbaycan ictimaiyyətinə çatdırmaqdır.Onun sözlərinə görə, azərbaycanlı jurnalistlərin Özbəkistana məqsədyönlü səfərlərinin təşkili ölkədəki yeniliklərin və müasir inkişaf proseslərinin daha yaxından tanıdılmasına imkan yaradır.
