Azərbaycanda arxeoloji irsin qorunması və tarixi ərazilərin mühafizəsi istiqamətində yeni addım atılıb. Prezident İlham Əliyev “Azıx-Tağlar Arxeoloji Parkı” Dövlət Qoruğunun yaradılması ilə bağlı sərəncam imzalayıb.
Elpress.az xəbər verir ki, sərəncama əsasən, qoruğun fəaliyyətinin təşkili və ərazisinin mühafizəsi ilə bağlı bir sıra tədbirlər həyata keçiriləcək.
Nazirlər Kabinetinə üç ay müddətində qoruğun əsasnaməsini təsdiqləmək, onun sərhədlərini və mühafizə zonasını müəyyənləşdirmək tapşırılıb. Həmçinin ərazidə tətbiq olunacaq xüsusi rejimin müəyyən edilməsi, qoruğun maddi-texniki təminatının təşkili və sərəncamdan irəli gələn digər məsələlərin həlli nəzərdə tutulur.
Mədəniyyət Nazirliyi isə yeni dövlət qoruğunun idarə olunmasını təmin etməli və onun fəaliyyətinin təşkili üçün zəruri tədbirlər görməlidir.
Qoruğun saxlanılması və fəaliyyətinin təmin edilməsi ilə bağlı xərclər dövlət büdcəsində Mədəniyyət Nazirliyi üçün nəzərdə tutulan vəsait hesabına maliyyələşdiriləcək.
