Praqada keçirilən “Food and Culture” festivalı müxtəlif ölkələrin mədəniyyətlərini bir araya toplayıb
Elpress.az-ın Azərtac.az-a istinadən verdiyi məlumata əsasən, Festival iştirakçıları burada müxtəlif xalqların zəngin mədəniyyəti, adət-ənənələri və milli mətbəx nümunələri ilə yaxından tanış olmaq imkanı əldə ediblər.Tədbirin açılışı xüsusilə təsirli və duyğulu anlarla yadda qalıb. Azərbaycan dili Bazar günü məktəbinin 9 yaşlı şagirdi Məryəm Çobanova milli geyimdə səhnəyə çıxaraq Emin Sabitoğlunun musiqisinə, Fikrət Qocanın sözlərinə bəstələnmiş mahnını gitarada ifa edib və festival iştirakçılarına səmimi, xoş ovqat bəxş edib.Daha sonra festivalın təşkilatçıları, Praqa 6 rayonunun meri Yakub Starek, rəsmi şəxslər və iştirakçı ölkələrin səfirləri qonaqları salamlayaraq tədbirin əhəmiyyətindən danışıblar. Azərbaycanın Çexiyadakı səfiri Yaşar Əliyev ziyarətçiləri Azərbaycan pavilyonuna dəvət edərək onları ölkəmizin zəngin mədəniyyəti, milli mətbəxi, ənənəvi təamları və məşhur nar şərabı ilə tanış olmağa çağırıb.Gün ərzində Çexiya paytaxtının minlərlə sakini və şəhər qonağı festivala baş çəkib. İş adamları Ceyhun Babayev, Oqtay Hacıyev və Gülnarə Əlizadənin hazırladığı Azərbaycan guşəsi ən çox maraq göstərilən və ən canlı məkanlardan birinə çevrilib. Ziyarətçilər Azərbaycan mədəniyyəti ilə böyük maraqla tanış olub, kabab, qutab, milli şirniyyatlar, nar şərabı və digər ənənəvi təamların dadına baxıblar.Festival növbəti dəfə mədəni müxtəlifliyin, qarşılıqlı anlaşmanın və xalqlar arasında dostluğun parlaq təntənəsinə çevrilib. Azərbaycanın tədbirdə iştirakı ölkəmizin zəngin mədəni irsini, qonaqpərvərlik ənənələrini və milli mətbəxinin rəngarəngliyini beynəlxalq auditoriyaya təqdim etmək baxımından mühüm rol oynayıb.
