Azərbaycan və Qırğızıstan arasında müttəfiqlik münasibətlərinin hüquqi əsaslarını müəyyən edən müqavilə təsdiqlənib. Sənəd iki ölkə arasında siyasi, təhlükəsizlik və iqtisadi sahələrdə əməkdaşlığın genişləndirilməsini nəzərdə tutur.
Elpress.az xəbər verir ki, Prezident İlham Əliyev “Azərbaycan Respublikası ilə Qırğız Respublikası arasında müttəfiqlik münasibətləri haqqında Müqavilə”nin təsdiq edilməsi barədə qanunu imzalayıb.
Müqavilə 2026-cı il iyulun 31-də Qırğızıstanın Çolpon-Ata şəhərində İlham Əliyev və Qırğızıstan Prezidenti Sadır Japarov tərəfindən imzalanıb. Milli Məclis sənədin təsdiq edilməsinə oktyabrın 13-də keçirilən plenar iclasda baxaraq qanun layihəsini qəbul edib.
Sənəd tərəflərin müstəqilliyinə, suverenliyinə və ərazi bütövlüyünə qarşılıqlı hörmət əsasında ikitərəfli əlaqələrin yeni mərhələyə yüksəldilməsini hədəfləyir.
Müqavilədə təhlükəsizlik, hərbi və hərbi-texniki əməkdaşlığın inkişafı, beynəlxalq təhdidlərə qarşı birgə fəaliyyət, eləcə də parlamentlərarası əlaqələrin gücləndirilməsi ilə bağlı müddəalar yer alır. Energetika, bərpaolunan enerji, nəqliyyat, logistika, kənd təsərrüfatı, turizm, elm, təhsil və mədəniyyət sahələrində əməkdaşlığın genişləndirilməsi də sənədin əsas istiqamətlərindəndir.
Müqaviləyə əsasən, sənəd tərəflərin ratifikasiya prosedurlarının tamamlanması barədə son yazılı bildirişin diplomatik kanallarla alınmasından sonra qüvvəyə minəcək.
