Azərbaycanda fəaliyyət göstərən rəqəmsal səhiyyə platforması “iCheck” tibbi xidmətlərə çıxış imkanlarını genişləndirmək məqsədilə “Referans Medical Group” ilə strateji əməkdaşlığa başlayıb. Tərəfdaşlığın əsas hədəfi onlayn konsultasiyadan müayinələrə qədər müxtəlif xidmətləri vahid rəqəmsal sistemdə birləşdirməkdir.
Elpress.az xəbər verir ki, “iCheck” PAŞA Holdinqin əməkdaşların innovativ ideyalarını biznes layihələrinə çevirməsinə dəstək verən “WeStart” proqramı çərçivəsində inkişaf etdirilən startaplardan biridir.
Əməkdaşlıq çərçivəsində platformanın texnoloji imkanlarının “Referans Medical Group”un tibbi infrastrukturu və həkim şəbəkəsi ilə birləşdirilməsi nəzərdə tutulur. Bu yanaşma pasiyentlərin uyğun həkim tapmasını, məsafədən məsləhət almasını və zəruri tibbi xidmətlərə yönləndirilməsini asanlaşdırmağa hesablanıb.
“iCheck” istifadəçilərə olduqları yerdən asılı olmayaraq həkimlə onlayn əlaqə yaratmaq imkanı verir. Platformanın xidmətlərindən fərdi pasiyentlərlə yanaşı, sığorta şirkətlərinin müştəriləri və korporativ istifadəçilər də yararlanırlar.
Yeni tərəfdaşlığın məqsədi platformanı yalnız onlayn konsultasiya xidməti ilə məhdudlaşdırmamaq, tibbi xidmətlərin müxtəlif mərhələlərini əhatə edən rəqəmsal sağlamlıq həllinə çevirməkdir. Buraya həkim seçimi, konsultasiya, müayinələrin təşkili və sonrakı tibbi addımların əlaqələndirilməsi daxildir.
“iCheck”in təsisçisi Leyla Orucova bildirib ki, platformanın uzunmüddətli hədəfi insanların həm fiziki, həm də mental sağlamlıqla bağlı sualları yarandıqda müraciət etdikləri əsas rəqəmsal ünvanlardan birinə çevrilməkdir. Onun sözlərinə görə, layihə insanları yalnız xəstələndikdə deyil, sağlam olduqları dövrdə də öz sağlamlıqlarına diqqət yetirməyə təşviq etməyi qarşıya məqsəd qoyur.
