Bakıda “Gənclik”, “Nərimanov” və “Koroğlu” metro stansiyaları istiqamətində nəqliyyat yükünün azaldılması üçün inşa edilən yeni avtomobil yolunda tikinti işləri davam edir. Layihənin ümumi icra səviyyəsi 62,8 faizə çatıb.
Elpress.az xəbər verir ki, Azərbaycan Avtomobil Yolları Dövlət Agentliyinin məlumatına görə, 3,9 kilometr uzunluğunda nəzərdə tutulan yol Həsən Əliyev küçəsindən başlayaraq Ziya Bünyadov prospektinə paralel şəkildə “Koroğlu” metro stansiyasına qədər uzanacaq.
Yeni yolun əsas məqsədi paytaxtın mühüm nəqliyyat arteriyaları arasında alternativ əlaqə yaratmaq, avtomobillərin hərəkətini daha səmərəli bölüşdürmək və mövcud yolların yükünü azaltmaqdır.
Layihə çərçivəsində beş yol qovşağının, dörd tunelin və üç yeraltı piyada keçidinin inşası nəzərdə tutulub. Hazırda tunellər üzrə işlərin 66,46 faizi, yeraltı piyada keçidləri üzrə isə 82 faizi başa çatdırılıb.
Bununla yanaşı, kommunikasiya xətlərinin köçürülməsi və yolun tikintisi ilə bağlı digər işlər də davam etdirilir.
Yeni yolun istifadəyə verilməsi ilə Heydər Əliyev və Ziya Bünyadov prospektlərində hərəkətin yaxşılaşdırılması, eləcə də adıçəkilən metro stansiyalarının ətrafında nəqliyyat sıxlığının azaldılması gözlənilir.
Layihə Bakı şəhərində və ətraf ərazilərdə nəqliyyat infrastrukturunun təkmilləşdirilməsini nəzərdə tutan 2025–2030-cu illər üzrə Dövlət Proqramı çərçivəsində həyata keçirilir. Yolun istifadəyə veriləcəyi tarix barədə təqdim olunan məlumatda konkret vaxt göstərilməyib.
