Azərbaycan vətəndaşının Ermənistanla dövlət sərhədini keçərək qonşu ölkənin ərazisinə daxil olduğu iddia edilir. Ermənistan mediasının yaydığı məlumata görə, həmin şəxsin Tavuş vilayətində saxlanıldığı bildirilir.
Elpress.az xəbər verir ki, bu barədə Ermənistan KİV-ləri Berd şəhərindəki mənbələrə istinadla məlumat yayıb.
Yerli sakinlərin sözlərinə görə, çoban Çinari kəndi istiqamətində sərhədi keçib. İlkin məlumatlarda onun Berd şəhərindəki hərbi polis bölməsinə aparıldığı qeyd olunur.
Ermənistanın Müdafiə Nazirliyi hadisə ilə bağlı hələlik rəsmi açıqlama verməyib. Milli Təhlükəsizlik Xidməti də ilkin mərhələdə məlumatın onlarda olmadığını bildirib və məsələnin dəqiqləşdirilməsi üçün yazılı sorğu tələb edib.
Hadisənin hansı şəraitdə baş verdiyi, şəxsin sərhədi hansı səbəbdən keçdiyi və hazırkı hüquqi statusu barədə rəsmi təsdiqlənmiş məlumat yoxdur.
