Əmək və əhalinin sosial müdafiəsi naziri Anar Əliyev Beynəlxalq Əmək Konfransının sessiyasında çıxış edərək ölkədə həyata keçirilən sosial və rəqəmsal islahatlardan danışıb.
Elpress.az xəbər verir ki, bu barədə Əmək və Əhalinin Sosial Müdafiəsi Nazirliyi məlumat yayıb.Bildirilib ki, Azərbaycan nümayəndə heyətinin rəhbəri olan Anar Əliyev çıxışında rəqəmsal texnologiyaların və süni intellektin tətbiqinin ölkənin əsas inkişaf prioritetlərindən biri olduğunu vurğulayıb. O, Prezident İlham Əliyevin rəhbərliyi ilə son illərdə həyata keçirilən sosial islahatların nəticələrindən bəhs edib.Nazir qeyd edib ki, əmək, məşğulluq və sosial müdafiə sahələrində təqdim olunan 150 xidmətin 90 faizdən çoxu rəqəmsallaşdırılıb, 50-dən artıq xidmət isə proaktiv qaydada vətəndaşlara təqdim edilir. Onun sözlərinə görə, “Əmək və Məşğulluq” altsistemi əmək münasibətlərinin vahid rəqəmsal platforması kimi fəaliyyət göstərir və aktiv əmək müqavilələrinin 97 faizi elektron formada bu sistem üzərindən bağlanıb.Anar Əliyev həmçinin DOST konsepsiyasının uğurlarına toxunaraq Azərbaycanın artıq Beynəlxalq Əmək Təşkilatının 60 konvensiyasına qoşulduğunu, daha dörd konvensiyanın ratifikasiya imkanlarının nəzərdən keçirildiyini bildirib.Nazir işğaldan azad olunmuş ərazilərdə aparılan yenidənqurma işlərindən, əhalinin məşğulluğunun təmin olunması istiqamətində görülən tədbirlərdən də danışıb. O, Azərbaycan ilə BƏT arasında həyata keçirilən iki Layiqli Əmək Ölkə Proqramının uğurla başa çatdığını, 2025–2029-cu illəri əhatə edən növbəti proqramın isə ötən ilin sonunda imzalandığını diqqətə çatdırıb.Sessiya çərçivəsində Anar Əliyev BƏT-in Baş direktoru Jilber Hunqbo ilə də görüş keçirib. Görüşdə əmək münasibətlərinin rəqəmsallaşdırılması, gender islahatları, beynəlxalq sənədlərin ratifikasiyası və gələcək əməkdaşlıq perspektivləri ətrafında fikir mübadiləsi aparılıb.
