Tehran və Düşənbə arasında yanacaq və xam neft tədarükünü əhatə edən uzunmüddətli saziş hazırlanır
Elpress.az xəbər verir ki, İran və Tacikistan enerji sektorunda uzunmüddətli əməkdaşlığı nəzərdə tutan yeni müqavilə imzalamağa hazırlaşır.İranın neft naziri Möhsün Paknejad Tacikistanın energetika və su ehtiyatları naziri Cümə Dəlyer ilə görüşdən sonra bildirib ki, iki ölkə arasında hazırlanacaq uzunmüddətli sazişin əsas çərçivəsi artıq razılaşdırılıb.Onun sözlərinə görə, son iki il ərzində aparılan danışıqlarda əsas diqqət İranın neft məhsullarının Tacikistana ixrac imkanlarına yönəlib. Əməkdaşlığın Tacikistanın enerji təminatında mövcud çətinliklərin müəyyən hissəsinin aradan qaldırılmasına töhfə verməsi gözlənilir.Paknejad qeyd edib ki, müqavilənin texniki və logistika məsələlərini dəqiqləşdirmək məqsədilə ekspertlərdən ibarət işçi qrup yaradılacaq. Saziş çərçivəsində Tacikistanın yanacaq ehtiyaclarının qarşılanması ilə yanaşı, ölkədəki neft emalı müəssisələri üçün xam neft tədarükünün də təmin edilməsi planlaşdırılır.İranlı nazir iki ölkə arasında daha əvvəl əldə olunan razılaşmaların əksəriyyətinin icra mərhələsində olduğunu və əməkdaşlığın praktiki müstəviyə keçdiyini vurğulayıb.Paknejad əlavə edib ki, yeni saziş qlobal enerji böhranının davam etdiyi bir şəraitdə Tacikistanın yanacaq təminatı ilə bağlı problemlərinin həllinə kömək göstərə bilər.
