Bakı, Aktau, Kurık, Türkmənbaşı, Poti və Batumi limanlarının rəhbərləri görüşüb
Elpress.az xəbər verir ki, Bakı Beynəlxalq Dəniz Limanının təşkilatçılığı ilə CICA Liman Rəhbərləri Konfransı çərçivəsində Xəzər və Qara dəniz hövzəsində fəaliyyət göstərən limanların rəhbər heyətləri arasında görüş keçirilib.Toplantıda Aktau, Kurık, Türkmənbaşı, Poti və Batumi limanlarının nümayəndələri iştirak edib. Görüşün əsas məqsədi Xəzər və Qara dəniz hövzələrini daha səmərəli, etibarlı və rəqabətqabiliyyətli nəqliyyat-logistika məkanına çevirmək üçün regional əməkdaşlığın gücləndirilməsi olub.Müzakirələr zamanı Orta Dəhlizin artan strateji əhəmiyyəti, limanlar arasında koordinasiyanın yaxşılaşdırılması və yük daşımalarının daha sürətli və proqnozlaşdırılan şəkildə təşkili məsələləri diqqətə çatdırılıb. Həmçinin birgə layihələr və əməkdaşlığın yeni istiqamətləri barədə fikir mübadiləsi aparılıb.Bildirilib ki, 2026-cı ilin ilk 8 ayının ilkin nəticələrinə əsasən, Bakı Limanı ilə Türkmənistan limanları arasında yük dövriyyəsi ötən ilin eyni dövrü ilə müqayisədə 34,6 faiz, Qazaxıstan limanları ilə isə 6 faiz artıb.Görüşdə limanların qarşılaşdığı əsas çətinliklər də müzakirə olunub və regional əməkdaşlığın daha dayanıqlı və institusional əsasda inkişaf etdirilməsi imkanları nəzərdən keçirilib.
