Bakı Arbitraj Mərkəzi ilə PAŞA Holding arasında LEGIS Hüquq Forumu layihəsi çərçivəsində əməkdaşlığın əsasını qoyan Memorandum imzalanıb.
Elpress.az xəbər verir ki, sənəd Bakı Arbitraj Mərkəzinin İdarə Heyətinin sədri Kəmalə Mehdiyeva və PAŞA Holding MMC-nin Hüquq və Dövlət qurumları ilə əlaqədar funksiyasının direktoru, LEGIS Hüquq Forumunun Təşkilat Komitəsinin sədri Aytac Qasımova tərəfindən imzalanıb.
Bildirilib ki, memorandum Azərbaycanda arbitrajın inkişafına, mübahisələrin alternativ həlli mexanizmlərinin təkmilləşdirilməsinə və Bakı Arbitraj Mərkəzinin institusional potensialının gücləndirilməsinə xidmət edəcək.Əməkdaşlıq çərçivəsində arbitraj sahəsində maarifləndirmə layihələri, nəşrlər, konfranslar, seminarlar və təlim proqramlarının təşkili, eləcə də hüquq ictimaiyyəti, tələbələr və gənc hüquqşünaslar arasında arbitraj mədəniyyətinin təşviqi nəzərdə tutulur.Kəmalə Mehdiyeva bildirib ki, imzalanan memorandum arbitraj institutunun inkişafına mühüm töhfə verəcək.
Aytac Qasımova isə qeyd edib ki, əməkdaşlıq hüquq təhsili ilə praktikanın bir araya gətirilməsinə, gənc hüquqşünasların peşəkar bilik və bacarıqlarının artırılmasına imkan yaradacaq.
