Yeni təsdiqlənən subsidiya qaydaları ilə heyvandarlıq istehsalçıları üçün genişmiqyaslı dövlət dəstəyi alətləri təsbit olunub.
Göygöldə jurnalistlərə açıqlama verən kənd təsərrüfatı nazirinin müavini Zaur Əliyev bildirib ki, yeni təsdiqlənən subsidiya qaydaları çərçivəsində heyvandarlıq və aqrar istehsalçılar üçün geniş dəstək mexanizmləri tətbiq olunacaq. Onun sözlərinə görə, yeni qaydalara əsasən cins heyvan subsidiyası ilə yanaşı, ilk dəfə olaraq süd, ət, yun və dəri məhsullarına da məhsul subsidiyası veriləcək. Eyni zamanda bağçılıq, sertifikatlaşma və birillik əkinlər üzrə kredit faizlərinin 19 faizə qədər hissəsinin dövlət tərəfindən qarşılanması üçün hüquqi baza yaradılıb və bu mexanizmlərin icra qaydaları yaxın zamanda Subsidiya Şurasında açıqlanacaq.Zaur Əliyev aqrar sığortanın da genişləndirildiyini vurğulayaraq qeyd edib ki, plan üzrə sığortalanan əkin sahələrinin həcmi 1 milyon hektara, sığortalanmış heyvanların sayı isə 100 min başdan yuxarı səviyyəyə çatdırılacaq. Bundan əlavə, indiyədək sığorta sisteminə daxil olmayan sahələrin, xüsusilə quşçuluq və digər heyvandarlıq istiqamətlərinin də mərhələli şəkildə sistemə inteqrasiya olunması nəzərdə tutulur. O, yeni mexanizmin əsas məqsədlərindən birinin də subsidiyaların daha operativ və sürətli şəkildə fermerlərə çatdırılması olduğunu diqqətə çatdırıb.
