Ağdam rayonunda Milli Qəhrəman Allahverdi Bağırovun xatirəsi anılıb. Rayon icra hakimiyyətinin təşkilatçılığı ilə keçirilən tədbirdə onun ailə üzvləri, döyüş yoldaşları, şəhid ailələri, qazilər, YAP Ağdam rayon təşkilatının, hüquq-mühafizə orqanlarının, idarə və təşkilat rəhbərləri, ziyalılar və ictimaiyyət nümayəndələri iştirak ediblər.
Tədbir iştirakçıları əvvəlcə “Şəhidlər” Abidə Kompleksini ziyarət ediblər. Ağdam Muğam Mərkəzində davam edən mərasimdə Dövlət Himni səsləndirilib, Ulu Öndər Heydər Əliyevin və şəhidlərin xatirəsi bir dəqiqəlik sükutla ehtiramla yad olunub. Daha sonra Milli Qəhrəman Allahverdi Bağırovun həyat və döyüş yolundan bəhs edən “Mətin komandir” adlı sənədli film nümayiş etdirilib.Çıxış edən Ağdam Rayon İcra Hakimiyyətinin başçısı Vaqif Həsənov, Milli Məclisin deputatı Elman Məmmədov və digər natiqlər Allahverdi Bağırovun Azərbaycanın ərazi bütövlüyü uğrunda göstərdiyi misilsiz qəhrəmanlıqdan, Xocalı faciəsi zamanı yüzlərlə insanın xilas edilməsindəki xidmətlərindən və Vətənə bağlılığından danışıblar.Qeyd olunub ki, Allahverdi Teymur oğlu Bağırov 1946-cı il aprelin 22-də Ağdam şəhərində anadan olub, 1965-ci ildə 1 nömrəli orta məktəbi bitirib, idmanla məşğul olub və “Qarabağ” futbol klubunda məşqçi kimi fəaliyyət göstərib. Ermənistanın Azərbaycana qarşı təcavüzü zamanı o, Ağdamda könüllü batalyon yaradaraq bölgənin müdafiəsində fəal iştirak edib, Xocalı faciəsi zamanı isə əsirlərin azad olunması və həlak olanların çıxarılmasında mühüm rol oynayıb.1992-ci il iyunun 12-də onun rəhbərliyi ilə bir sıra kəndlərin azad edilməsindən sonra Ağdama qayıdarkən xidməti avtomobilinin minaya düşməsi nəticəsində həlak olub və Ağdam şəhər Şəhidlər xiyabanında dəfn edilib.Sonda Milli Qəhrəmanın ailə üzvləri dövlət tərəfindən şəhid ailələrinə göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya minnətdarlıqlarını ifadə ediblər.
