Azərbaycan Prezidenti İlham Əliyev Ermənistanın işğalı altında olmuş torpaqların azad edilməsi, ədalətin və beynəlxalq hüququn bərpası barədə danışıb.
Dövlət başçısı bu fikirləri oktyabrın 27-də Bakıda keçirilən VII Ümumdünya Mədəniyyətlərarası Dialoq Forumunun açılış mərasimində səsləndirib.
Prezident bildirib ki, Azərbaycanın əsas məqsədlərindən biri uzun illər işğal altında qalan ərazilərinin azad edilməsi və ərazi bütövlüyünün bərpası olub. Onun sözlərinə görə, uzun müddət davam edən danışıqlar münaqişənin həllinə gətirib çıxarmayıb.
İlham Əliyev qeyd edib ki, Azərbaycan məsələnin həlli zamanı BMT Nizamnaməsində, o cümlədən özünümüdafiə hüququnu təsbit edən 51-ci maddədə nəzərdə tutulan hüquqlara əsaslanıb.
Dövlət başçısı vurğulayıb ki, 2020-ci ildə baş vermiş İkinci Qarabağ müharibəsi və 2023-cü ildə keçirilmiş antiterror tədbirləri nəticəsində işğala son qoyulub, Azərbaycanın ərazi bütövlüyü və suverenliyi tam bərpa edilib.
Prezident, həmçinin BMT Təhlükəsizlik Şurasının 1993-cü ildə qəbul etdiyi və Ermənistan qoşunlarının Azərbaycan ərazilərindən çıxarılmasını tələb edən qətnamələrə toxunub. O bildirib ki, həmin sənədlər uzun illər icra olunmamış qalıb.
İlham Əliyev çıxışında Azərbaycanın müharibədən sonra sülh təşəbbüsü ilə çıxış etdiyini də diqqətə çatdırıb. Dövlət başçısının sözlərinə görə, məqsəd yeni qarşıdurmalara yol verməmək və davamlı sülhə nail olmaqdır.
Qeyd edək ki, “Ortaq gələcək naminə dialoq” mövzusuna həsr olunan VII Ümumdünya Mədəniyyətlərarası Dialoq Forumu Bakıda keçirilir. Tədbir mədəniyyətlər və dinlər arasında dialoqun təşviqi, eləcə də qlobal problemlərin müzakirəsi baxımından beynəlxalq platforma kimi təşkil olunur.
