Bakı Metropoliteninin bütün 27 stansiyasında avtomatik xarici defibrilyatorların (AED) quraşdırılması nəzərdə tutulur. Cihazların yerləşdirilməsi ilə bağlı tender prosesi keçirilib və işlər yekun mərhələyə çatıb.
Elpress.az xəbər verir ki, bu barədə “Bakı Metropoliteni” QSC Oxu.Az-ın sorğusuna cavabında məlumat verib.
Qurumdan bildirilib ki, stansiyaların AED cihazları ilə təmin olunması ilə yanaşı, bu istiqamətdə digər zəruri tədbirlər də görüləcək.
Avtomatik xarici defibrilyatorlar ürəyin qəfil dayanması zamanı təcili yardım göstərmək üçün istifadə edilən portativ tibbi cihazlardır. Aparat ürəyin ritmini təhlil edir və zəruri hallarda elektrik impulsu verərək normal ritmin bərpasına kömək edir.
Belə cihazların metro stansiyalarında yerləşdirilməsi sərnişinlər arasında qəfil ürək dayanması baş verdikdə ilkin müdaxilənin daha operativ həyata keçirilməsinə imkan yarada bilər.
