Elpress.az xəbər verir ki, “Azərbaycan Hava Yolları” QSC-nin (AZAL) strukturuna daxil olan Sərnişin Aviaşirkətinə yeni baş icraçı direktor təyin edilib.
Bu vəzifəyə aviasiya sahəsində 30 ildən artıq təcrübəyə malik Mario Çaves gətirilib. O, aviaşirkətin növbəti inkişaf mərhələsinə rəhbərlik edəcək.Mario Çaves 2023-cü ildən “TAP Air Portugal” şirkətində əməliyyatlar üzrə baş direktor vəzifəsində çalışıb. Bundan əvvəl isə “Portugalia Airlines”də baş icraçı direktor, “Grupo SATA”da əməliyyatlar və kommersiya üzrə baş direktor vəzifələrini tutub. O, həmçinin “Cabo Verde Airlines”də müəyyən müddət baş icraçı direktor vəzifəsini icra edib, daha sonra korporativ işlər üzrə baş direktor kimi fəaliyyət göstərib.Çaves aviasiya sektorunda karyerasına 1995-ci ildə başlayıb. 1998-ci ildən “TAP Air Portugal”da pilot kimi çalışan mütəxəssis sonrakı illərdə IATA-nın baş qərargahında uçuş əməliyyatları, tənzimləmə və səmərəlilik istiqamətlərində rəhbər vəzifələrdə fəaliyyət göstərib. O, müxtəlif beynəlxalq aviaşirkətlərdə də yüksək vəzifələrdə çalışıb.Yeni rəhbərin əməliyyat və kommersiya idarəçiliyi, eləcə də beynəlxalq aviasiya sahəsində geniş təcrübəsinin aviaşirkətin inkişaf və genişlənmə strategiyasına töhfə verəcəyi bildirilir.
Qeyd olunub ki, təyinat AZAL-ın davamlı inkişaf, əməliyyat səmərəliliyinin yüksəldilməsi və xidmət keyfiyyətinin artırılması istiqamətində həyata keçirdiyi tədbirlərin davamıdır.
