Elpress.az xəbər verir ki, xaricdə yaşayan azərbaycanlı uşaqların ana dilində, milli tarix və mədəni dəyərlər əsasında təhsil almasının əhəmiyyəti gündəmə gətirilib.
İsa Türkoğlunun fikrincə, qloballaşma və miqrasiya şəraitində xaricdə böyüyən azərbaycanlı uşaqların milli kimliyinin qorunması yalnız ailələrin deyil, dövlət qurumlarının və diaspor təşkilatlarının da diqqətində olmalıdır.Qeyd edilir ki, ana dilinin öyrənilməsi, Azərbaycan tarixi və mədəni irsi ilə tanışlıq uşaqların milli mənsubiyyətlərini daha yaxşı dərk etməsinə və ölkə ilə mənəvi bağlarının möhkəmlənməsinə imkan yaradır.Böyük Britaniya və digər ölkələrdə yaşayan azərbaycanlı uşaqların həmin ölkələrin təhsil imkanlarından yararlanaraq müxtəlif sahələrdə uğur qazanmasının mümkün olduğu vurğulanır. Bununla yanaşı, onların Azərbaycan dili və milli-mədəni dəyərləri mənimsəməsi gələcəkdə ölkənin beynəlxalq səviyyədə tanıdılmasına və milli maraqların təmsil olunmasına töhfə verə bilər.Müəllif bu istiqamətdə dövlət qurumları ilə diaspor təşkilatları arasında əməkdaşlığın gücləndirilməsini, həftəsonu Azərbaycan məktəblərinin və dil kurslarının fəaliyyətinin genişləndirilməsini, eləcə də mədəni-maarif proqramlarının inkişaf etdirilməsini təklif edib.İsa Türkoğlu dövlət qurumlarına müraciət edərək xaricdə yaşayan azərbaycanlı uşaqların ana dilində təhsilinə dair konkret proqramların hazırlanmasını və bu sahəyə maliyyə dəstəyinin artırılmasını tövsiyə edib.Onun fikrincə, bu gün milli təhsilə yönəldilən sərmayə gələcəkdə Azərbaycanla bağlılığı güclü olan intellektual və ictimai potensialın formalaşmasına xidmət edə bilər.
