Türkiyə “Süni İntellekt üzrə 2026-2030-cu illər üçün Fəaliyyət Planı”nı təqdim edib.
Elpress.az xəbər verir ki, İstanbulda keçirilən Süni İntellekt Zirvəsində açıqlanan sənəd ölkənin bu sahədə qarşıdakı beş il üçün əsas hədəflərini müəyyənləşdirir.Türkiyə Prezidenti Recep Tayyip Erdoğan bildirib ki, plan “fərqinə varmaq”, “istifadə etmək”, “istehsal etmək” və “idarə etmək” prinsipləri üzərində qurulub. Layihə çərçivəsində ilk mərhələdə “Milli Süni İntellekt Savadlılığı Proqramı” həyata keçiriləcək və iki il ərzində 5 milyon vətəndaşın təlimlərə cəlb olunması nəzərdə tutulur.Proqram çərçivəsində 10 min yüksəkixtisaslı süni intellekt mütəxəssisinin və 100 min peşəkar kadrın hazırlanması planlaşdırılır. Eyni zamanda, səhiyyə, kənd təsərrüfatı, müdafiə və elektron ticarət sahələrini əhatə edən 2 minə yaxın dövlət məlumat bazasının istifadəyə verilməsi nəzərdə tutulur.Fəaliyyət Planına əsasən, dövlət investisiya proqramlarında süni intellekt layihələrinə minimum 2 faiz vəsait ayrılacaq. Həmçinin 2030-cu ilədək ölkədə məlumat mərkəzlərinin quraşdırılmış gücünün 1 giqavata çatdırılması hədəflənir.Məlumat mərkəzləri, bulud texnologiyaları və süni intellekt infrastrukturlarının inkişafı üçün özəl sektorun iştirakı ilə ən azı 10 milyard dollar həcmində investisiya yatırılması planlaşdırılır.Prezident qeyd edib ki, məqsəd İstanbulu süni intellekt sahəsində beynəlxalq sərmayə və innovasiya mərkəzinə çevirmək, Türkiyəni isə bu texnologiyanın inkişafında aparıcı ölkələr sırasına çıxarmaqdır.
